ઉન્માદ થઈ ફરે છે એ છોકરી અજબ છે
રગ રગ મહીં વહે છે એ છોકરી અજબ છે

રૂપક ધરી શકે છે, રંગો બની શકે છે
એટલે મને ગમે છે એ છોકરી અજબ છે

જાણે ન કોઈ એવું શોધ્યું છે સ્થળ મિલનનું
જો, ખ્વાબમાં મળે છે એ છોકરી અજબ છે

એને નયનથી રમવો છે ખેલ એટલે તો
ચોપાટ ગોઠવે છે એ છોકરી અજબ છે

ના શબ્દ એક બોલું પણ તોય સમજી જાશે
એ મૌન પણ કળે છે એ છોકરી અજબ છે

શરમાઈ જાય રંગો એવો કંઈક ઈશારો
એ ફૂલને કરે છે એ છોકરી અજબ છે

આવીને યાદ એની ઘર મઘમઘાવે 'પાગલ'
તનહાઈ પણ ગમે છે એ છોકરી અજબ છે
- અલ્પેશ "પાગલ